ព្រះសីហនុ៖ ជនសង្ស័យជនជាតិចិន និងខ្មែរចំនួន ៤នាក់ ត្រូវបានសមត្ថកិច្ចឃាត់ខ្លួន ក្រោយពាក់ព័ន្ធនឹងករណីផ្ទុះអាវុធបង្កការភ្ញាក់ផ្អើលដល់ពលរដ្ឋនៅត្រង់ចំណុចមុខក្លឹបកំសាន្តអូស្កា ស្ថិតក្នុងភូមិ៤ សង្កាត់៤ ក្រុងព្រះសីហនុកាលពីថ្ងៃទី១២ ខែមីនា ឆ្នាំ២០២៣។

ស្នងការនៃស្នងការដ្ឋាននគរបាលខេត្តព្រះសីហនុ លោកឧត្តមសេនីយ៌ទោ ជួន ណារិន្ទ បានបញ្ជាក់ថា ជនសង្ស័យ ១ក្រុមមានគ្នា ៥នាក់ បានធ្វើសកម្មភាពផ្ទុះអាវុធ ក្រោយធ្វើសកម្មភាពជនសង្ស័យទាំងនោះបានជិះរថយន្តចំនួន ២គ្រឿងរត់គេចខ្លួនបាត់។

សមត្ថកិច្ចបានចុះទៅដល់កន្លែងកើតហេតុ ដោយរកឃើញសំបកគ្រាប់កាទូសចំនួន ៥គ្រាប់ បន្សល់ទុកនៅកន្លែងកើតហេតុ។ សមត្ថកិច្ចបានស្រាវជ្រាវ និងបានឃាត់ខ្លួនជនសង្ស័យចំនួន ៤នាក់ នៅកាស៊ីណូមួយកន្លែងស្ថិតនៅក្នុងភូមិ៣ សង្កាត់១ ក្រុងព្រះសីហនុ។

ជាមួយគ្នានេះសមត្ថកិច្ចបានដកហូតវត្ថុតាងដូចជាអាវុធខ្លី១ដើម ម៉ាក Sigsauer P365 មានលេខសម្គាល់ 66A985948 (បង់២ មាន១៤គ្រាប់) សំបកគ្រាប់កាទូស ៥គ្រាប់ និងរថយន្ត ២គ្រឿង ១គ្រឿង ម៉ាក Range Rover ពណ៌ស ពាក់ស្លាកលេខ ភ្នំពេញ 2BM-8726 និង ១គ្រឿងទៀតម៉ាក Peugot ពណ៌ខ្មៅ ពាក់ស្លាកលេខ ព្រះសីហនុ 2E-8998។

ករណីនេះ ការិយាល័យនគរបាលព្រហ្មទណ្ឌកម្រិតស្រាលកំពុងបន្តនិតិវិធី និងស្វែងរកបក្ខពួកដែលកំពុងរត់គេចខ្លួន៕